ភ្នំពេញ៖ រដ្ឋាភិបាលជប៉ុនបានផ្តល់ជំនួយឥតសំណងចំនួន ៦៩ ៣៣៣ដុល្លារអាមេរិក សម្រាប់គាំទ្រការសង្កេតការណ៍បោះឆ្នោតជ្រើសតាំងតំណាងរាស្ត្រដែលនឹងធ្វើឡើងនៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ។

កាលពីថ្ងៃទី១០ ខែឧសភា ឆ្នាំ២០២៣ ឯកអគ្គរាជទូតជប៉ុនប្រចាំកម្ពុជា លោក អ៊ូអិណុ អាត់ស៊ូស៊ី និងនាយកប្រតិបត្តិគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា (គ.ប.ស.យ) លោក គឹម ឈន បានចុះហត្ថលេខាលើកិច្ចសន្យាផ្តល់ជំនួយនេះ។

ឯកអគ្គរាជទូត អ៊ូអិណុ បានលើកឡើងអំពីកិច្ចសហប្រតិបត្តិការកន្លងមករបស់ជប៉ុនក្នុងការគាំទ្រលទ្ធិប្រជាធិបតេយ្យនៅកម្ពុជា។ លោកសង្ឃឹមថាគម្រោងនេះនឹងជួយធានាបាននូវការបោះឆ្នោតដោយសេរី និងយុត្តិធម៌នៅកម្ពុជា។

គូសបញ្ជាក់ថា គិតចាប់ពីថ្ងៃទី០៨ ខែឧសភា គ.ជ.ប បានទទួលស្គាល់អ្នកសង្កេតការណ៍ជាតិសរុបចំនួន ១០ ១៣០នាក់ ក្នុងនោះស្រី ៥ ០៥៦នាក់ ប៉ុន្តែមិនទាន់ទទួលពាក្យសុំសង្កេតការណ៍របស់អ្នកសង្កេតការណ៍អន្តរជាតិពីស្ថាប័ន ឬប្រទេសណាមួយនៅឡើយទេ៕